AMANTE, ISUSULONG SA KONGRESO ANG MGA HINAING NG MGA LAGUNENSE

CALAMBA CITY, Laguna — Nangako si Laguna 3rd District Representative Loreto “Amben” Amante na isusulong sa pambansang pamahalaan ang mga hinaing at pangangailangan ng mga Lagunense kasunod ng pagdaraos ng LegisHear 2026 sa Calamba City noong Oktubre 9.

Sa ilalim ng temang “Bawat Batas Mahalaga,” binigyang-diin ni Amante ang kahalagahan ng pakikinig sa mga mamamayan upang matiyak na ang mga panukalang batas ay tumutugon sa mga aktuwal na suliranin ng mga komunidad.

Dinaluhan ang konsultasyon ng mga kinatawan mula sa iba’t ibang sektor at mga opisyal ng barangay na nagbahagi ng kanilang mga pananaw at rekomendasyon hinggil sa mga usaping nangangailangan ng aksiyon ng mga mambabatas.

Ayon kay Amante, mahalagang direktang marinig ang mga karanasan at pangangailangan ng publiko upang maging batayan sa pagbuo ng mga panukalang batas at polisiya na makatutulong sa mga mamamayan.

Binigyang-diin din ng kongresista ang kahalagahan ng pagkakaisa ng mga kinatawan ng iba’t ibang distrito ng Laguna upang matiyak na maipararating sa pambansang antas ang mga isyung kinakaharap ng lalawigan.

“Ang boses ng Laguna ay makakarating sa Kongreso at makakarating sa ating mahal na Pangulo,” ani Amante, na tumutukoy sa pagsusulong ng mga hinaing ng mga Lagunense kay Pangulong Ferdinand “Bongbong” Marcos Jr.

Layunin ng LegisHear 2026 na palakasin ang pakikilahok ng publiko sa proseso ng paggawa ng batas sa pamamagitan ng direktang konsultasyon sa mga mamamayan at pagkalap ng kanilang mga mungkahi para sa mga posibleng hakbang na pambatas.

Sa pamamagitan nito, nabibigyan ng pagkakataon ang iba’t ibang sektor na maipahayag ang kanilang mga pangangailangan at makibahagi sa paghubog ng mga panukalang batas na nakaaapekto sa kanilang mga komunidad.