𝗕𝗜: 𝗠𝗮𝗸𝗮𝗯𝗮𝗴𝗼𝗻𝗴 ‘𝗘𝗻𝗱-𝘁𝗼-𝗘𝗻𝗱’ 𝗕𝗼𝗿𝗱𝗲𝗿 𝗦𝗲𝗰𝘂𝗿𝗶𝘁𝘆 𝗦𝘆𝘀𝘁𝗲𝗺, 𝗶𝘁𝗶𝗻𝘂𝘁𝘂𝗿𝗶𝗻𝗴 𝗻𝗮 𝘀𝘂𝘀𝗶 𝘀𝗮 𝗺𝗮𝘀 𝗺𝗮𝘁𝗮𝘁𝗮𝗴 𝗻𝗮 𝘀𝗲𝗴𝘂𝗿𝗶𝗱𝗮𝗱 𝗻𝗴 𝗯𝗮𝗻𝘀𝗮

Sa panahon kung kailan patuloy na nagiging mas sopistikado ang mga banta ng human trafficking, terorismo, at iba pang transnational crimes, naniniwala ang Bureau of Immigration (BI) na panahon na upang iangat ng Pilipinas ang antas ng border security nito sa pamamagitan ng isang integrated at technology-driven na sistema.

Ayon sa BI, ang panukalang Civil Aviation and Immigration Security Services (CAISS) project ay maaaring maging mahalagang hakbang tungo sa modernisasyon ng border management ng bansa. Gagamit ang sistema ng artificial intelligence (AI), biometrics, at real-time data processing upang mas mabilis at mas epektibong matukoy ang mga indibidwal na posibleng magdulot ng banta sa pambansang seguridad bago pa man sila makapasok sa teritoryo ng Pilipinas.

Ipinaliwanag ni BI spokesperson Dana Sandoval na ang P10.74-bilyong Public-Private Partnership (PPP) proposal ay hindi lamang nakatuon sa Ninoy Aquino International Airport (NAIA), kundi sasaklaw sa 11 international airports, isang international seaport sa Zamboanga, at anim na border crossing stations sa buong bansa.

Bukod sa electronic gates at biometric systems, layunin din ng proyekto na mapahusay ang data assessment at passenger monitoring sa pamamagitan ng AI-powered analytics at data sorting mechanisms na maaaring makatulong sa mas target na pagtukoy sa mga posibleng sangkot sa kriminal na gawain.

Isa sa mga tampok ng panukala ay ang four-year technology refresh cycle na magtitiyak na ang BI ay patuloy na makakagamit ng pinakabagong teknolohiya nang hindi nangangailangan ng karagdagang gastusin mula sa gobyerno.

Iginiit din ng BI na ang financing scheme ng proyekto ay nakabatay sa user-pay principle, kung saan ang mga gagamit lamang ng serbisyo ang magbabayad para rito. Dahil dito, hindi umano madadagdagan ang pinansyal na pasanin ng mga mamamayang hindi direktang gumagamit ng sistema.

Dumaan na rin sa Swiss challenge ang proyekto, ngunit ayon sa BI, walang ibang kumpanya ang nagsumite ng counter-offer o alternatibong panukala.

Sa kasalukuyan, nananatili pa ring nasa ilalim ng pagsusuri ng Department of Finance, Department of Justice, at Office of the Solicitor General ang CAISS proposal. Wala pang pinal na kontrata at wala pang sinisingil na anumang bayarin kaugnay ng proyekto.

Para sa BI, ang CAISS ay hindi lamang usapin ng modernisasyon ng teknolohiya, kundi isang mahalagang pamumuhunan sa pambansang seguridad at kakayahan ng Pilipinas na makasabay sa mga karatig-bansa sa larangan ng border protection at immigration management.